មេរៀនទី៥៖ ការរញ្ជួយដី (មេរៀនសង្ខេប)

រញ្ជួយដី កើតឡើងនៅតាមព្រំដែនផ្លាកតិចតូនិចនៅពេលផ្លាកតិចតូនិចទង្គិចគ្នា រអិលប៉ះគ្នា ឬរសាត់ចេញពីគ្នា ។ សិលានៅតាមបណ្តោយស្នាមប្រេះមានលក្ខណៈពីរយ៉ាងគឺលក្ខណៈប្លាស្ទិចនិងលក្ខណៈយឺត ។ កំហូចទ្រង់ទ្រាយក្នុងលក្ខណៈយឺតបណ្តាលឲ្យស្រទាប់សិលារួញចូលហើយរលាស់បង្កើតបានជារញ្ជួយដី ។
គេចែករញ្ជួយដីជាបីប្រភេទ គឺរលកP រលកS និងរលកL។ រលករញ្ជួយដីទាំងបីនេះធ្វើចលនាខុសៗគ្នាកាត់ផែនដី។ រញ្ជួយវិទូប្រើប្រាស់ក្រាបរញ្ជួយដី ដើម្បីកំណត់ពេលវេលានិងទីកន្លែងដែលវាកើតឡើង។ គេប្រើមាត្រដ្ឋានរិចឆ្ទ័រនិងមេការលី ដើម្បីវាស់កម្លាំងនិងអត្រាបំផ្លាញនៃរញ្ជួយដី។
មូលហេតុដែលបណ្ដាលអោយមានការបំផ្លាញរួមមានការអង្រួនដី ភក់រាវរំញ័របន្ទាប់និងរលកសូណាមិ។
ដើម្បីការពាររញ្ជួយដីអ្នកត្រូវមានការរៀបចំគម្រោងចាប់តាំងពីមុនពេលរញ្ជួយដី ក្នុងពេលរញ្ជួយដី និងក្រោយពេលរញ្ជួយដីបានបញ្ចប់។