Curriculum
មេរៀនទី៩ ៖ ច្បាប់ភូមិបាល (មេរៀនសង្ខេប សំណួរ)
មេរៀនអត្ថបទ
១- គោលដៅនៃច្បាប់ភូមិបាល
ច្បាប់ភូមិបាល មានគោលដៅកំណត់របបកម្មសិទ្ធិលើអចលនវត្ថុទាំងឡាយនៅក្នុងព្រះរាជាណាចក្រកម្ពុជា ក្នុងគោលបំណងធានាការពារសិទ្ធិនៃកម្មសិទ្ធិ និងសិទ្ធិផ្សេងៗទៀតលើអចលនវត្ថុ ។
អចលនវត្ថុ មានបីប្រភេទ ដូចជា ៖
- អចលនវត្ថុពីកំណើត ៖ ដីព្រៃឈើ ដីកាប់រាន ដីដាំដុះ ដីទុកទំនេរ ឬមិនអាចដាំដុះ ដីលិចទឹកដោយទឹកនៅនឹងឬទឹកហូរ និងសំណង់ឬការរៀបចំទាំងឡាយដែលស្ថិតនៅជាប់ជាមួយកន្លែងកើតឡើងដោយអំពើរបស់មនុស្ស ហើយមិនអាចរំកិល ឬផ្លាស់ប្ដូរកន្លែងបាន ។
- អចលនវត្ថុពីភ័ព្វវាសនា ៖ វត្ថុដែលជាប់នឹងដីឬបញ្ចូលជាមួយសំណង់ទាំងឡាយដែលមិនអាចបំបែកបានដោយមិនធ្វើឲ្យមានការខូចខាតឬមិនដូរសភាពដើម ដូចជាដើមឈើ ឧបករណ៍តែងលម្អជាដើម ។
- អចលនវត្ថុតាមការកំណត់របស់ច្បាប់ ៖ មានសិទ្ធិភណ្ឌទាំងឡាយលើអចលនវត្ថុ និងចលនវត្ថុទាំងឡាយដែលកំណត់ដោយច្បាប់ ។
ការគ្រប់គ្រងផ្នែករដ្ឋបាលសុរិយោដីលើអចលនវត្ថុដែលជាទ្រព្យសម្បត្តិរបស់រដ្ឋ និងការចេញប័ណ្ណកម្មសិទ្ធិលើអចលនវត្ថុទូទាំងព្រះរាជាណាចក្រកម្ពុជា ជាសមត្ថកិច្ចរបស់ក្រសួងរៀបចំដែនដីនគរោបនីយកម្ម និងសំណង់ ។