១. និយមន័យ

ពលរដ្ឋ

ពលរដ្ឋជាប្រជាជន គឺជាប្រជាជនទាំងប្រុសស្រីដែលទុកជាកម្លាំងស្នូលសម្រាប់ប្រទេសជាតិ ។ ពលរដ្ឋជាប្រជាជនដែលមានអាយុចាប់ពី១៨ឆ្នាំឡើងទៅ។ ពលរដ្ឋ មិនមែនជាកុមារទេ គឺត្រូវមានការទទួលខុសត្រូវ តួនាទី និងករណីយកិច្ចចំពោះសង្គម និងចំពោះច្បាប់ ។ ពលរដ្ឋ ជាមនុស្សដែលមានកម្លាំងកាយ ប្រាជ្ញា ស្មារតីគ្រប់គ្រាន់សម្រាប់ធ្វើសកម្មភាពដោយសេរីតាមគោលបំណង និងចំណង់ចំណូលចិត្តរបស់ខ្លួនដោយស្ថិតនៅក្នុងក្របខ័ណ្ឌច្បាប់ ដើម្បីចូលរួមការពារអភិវឌ្ឍសង្គម ។

សិទ្ធិមនុស្ស

សិទ្ធិមនុស្ស ជាសិទ្ធិដែលសំដៅលើសិទ្ធិរស់រានមានជីវិត សិទ្ធិមានជម្រកស្នាក់នៅ សិទ្ធិមានសេរីភាព ….ឬសិទ្ធិខាងវប្បធម៌គឺសំដៅលើប្រពៃណី និងវប្បធម៌របស់ជាតិសាសន៍នីមួយៗ ដូចជាការគោរពចាស់ព្រឹទ្ធាចារ្យ ព្រលឹង ជំនឿលើខ្មោច អ្នកតា ទេវតាជាដើម ។

សិទ្ធិមនុស្ស គឺជាអ្វីៗដែលត្រូវតែប្រតិបត្តិជាចាំបាច់ ដើម្បីរស់នៅក្នុងសេចក្ដីថ្លៃថ្នូរជាមនុស្ស ដូចជា ៖

សិទ្ធិមនុស្ស គឺជាសិទ្ធិដែលធ្វើឲ្យមានលទ្ធភាពនឹងរស់រានបានដូចជាសិទ្ធិរស់រានមានជីវិត សិទ្ធិទទួលចំណីអាហារគ្រប់គ្រាន់ សិទ្ធិធ្វើឲ្យមានជីវិតរស់នៅប្រកបដោយគុណតម្លៃ សិទ្ធិឲ្យគេប្រព្រឹត្តមកលើខ្លួនក្នុងភាពជាមនុស្សជាដើម ។
សិទ្ធិមនុស្ស គឺជាសិទ្ធិដែលមានមកពីធម្មជាតិផ្ទាល់ខ្លួនរបស់មនុស្ស ហើយបើគ្មានសិទ្ធិនេះទេ គឺគេពុំអាចរស់នៅជាមួយគ្នាបានឡើយ ។ សិទ្ធិមនុស្ស មិនអាចត្រូវគេទិញ ផ្លាស់ប្ដូរ ឬផ្ទេរមរតក ឲ្យទៅនរណាម្នាក់បានទេ ។ ប្រភេទនៃសិទ្ធិរួមមាន សិទ្ធិពលរដ្ឋ សិទ្ធិនយោបាយ សិទ្ធិសេដ្ឋកិច្ច សិទ្ធិសង្គមកិច្ច និងសិទ្ធិវប្បធម៌ ។